每逢年尾年頭哩段時間都會見到好多朋友都o係 Facebook 或者 Blog 上面做過去一年o既回顧同來年展望 . 原本我冇哩個習慣 , 不過 2009 年確實對於我黎講係最 "精彩" o既一年 , 今年係我踏入人生第三十個年頭 .
2008 年中 , 我已經定下好多男人三十要達到o既目標 , 而我亦好努力一步一步咁於 2009 年續一達成 .
我三十歲o既目標有 : 結婚 , 升職 , 買樓 , 創業 , 幫師傅發揚北少林 , 重組籃球隊 , 生 BB .
我好叻 , 2009 年中已經實現左大部份 : 結婚 , 升職 , 買樓 , 重組籃球 ; 創業及幫師傅發揚北少林仍努力進行中 , 至於生 BB 就隨緣啦 .
我一直好信自己 , 只要努力 , 所有野都一定會在意料之內 , 達到只是遲早問題 . 2009 年由年頭至 8 月 , 簡直事事順利 , 好多好o既事情發生 . 除左好多目標實現左之外 , 我弟弟弟婦為余家帶黎一個小男孩 . 我以為會好足整年o既時候 , 唔好o既事接續而來 ......
我爺爺走左 , 跟住到我祖母走 , 我老婆被發現有婦科病 ...... 好采最後確定只是低危 .
跟住好事好似返黎 , 我老婆有左 BB ! 好開心 ! 滿以為衰運已經過 , 不過 BB 此時好唔穩定 , 老婆作小產 ...... 驚左一排 , 最終有驚無險的穩定過來 , 進入 12 月 .
經過 11 個月黎所有好事 , 唔好事o既磨練 , 身心已經好疲倦 . 2009 最後一個月只希望平平安安同一家人渡過 , 上半個月總算過得平靜 . 但係原來上天對我安排o既磨練仲未完 , 高潮往往發生在最後 , 我相信哩個絕對係我及我家人人生中其中一個最艱辛o既磨練 , 我老婆被發現心臟有問題而必須立即終止懷孕及進行心臟手術 ...... 2009 年 12 月 30 日送別了我的兒子 .
黎到今日 2010 年 1 月 2 日 , 一年之計在於春 , 我並冇任何計劃 , 只想許個願望 . 希望我老婆黎緊心臟手術非常成功 , 之後永遠都身體健康 . 仲有希望我父母冇晒病痛 , 永遠都身體健康 .
突然好天真咁諗 , 如果哩個世界上有 "叮噹" , 而佢又有 "法寶" 可以將病痛轉移 , 我會用佢將我老婆同我父母o既病痛轉移到我身上 ......
祈望好事好快重臨 .
沒有留言:
張貼留言