余太 . 愚太

世界上每個母親都係偉大 , 所以我都唔再重複哩 d 形容詞 . 可能帶點貶義 , 但我想用愚蠢嚟形容一位媽媽 – 愚太太 .

世上最愚蠢嘅事係咩 , 唔同人有唔同嘅睇法 , 而我就覺得最愚蠢嘅事莫過於用自己既生命去做賭博 ……

年半前 ,愚太太被發現心臟有問題 , 而且到左好危險既情度 , 必須要盡快做手術 . 醫生們向愚太太續一講解手術過程 , 風險 , 注意事項……其中一點係手術後不建議再次懷孕 . 愚太太好想為佢先生生 BB , 每次見到醫生佢都會喊住叫醫生幫佢 . 醫生大概比愚太太感動左 ,答應左會幫佢 . 不過醫生話整個懷孕過程都會好辛苦 , 而且無論對大人定 BB 都存在很大風險 . 

愚太太回答 : "我唔怕" . 之後就憑住哩個信念好勇敢咁完成左個大手術 .      
               
( 但其實當時愚先生已經同自己講 : 可能自己有兒女緣但冇兒女份 . 因為愚先生唔想太太再受苦喇 , 只想佢以後健健康康 , 開開心心 . )

大手術過後 , 愚太太仍然記住要生 BB , 每次覆診都會問醫生回復進度如何 , 幾時可以再懷孕 , 甚至計算好 ”日子” 約愚先生做BB . 起初愚先生都不太同意 , 但眼見太太嘅堅持 , 愚先生決定陪太太一齊去冒哩個險 .

愚太太計算嘅”日子”好準 , 一擊即中 , 佢再次懷孕喇 .

由於心臟手術後每日都必須口服嘅薄血藥對嬰兒成型初段有不良影響 , 所以當知道懷孕就要立即入院 , 釣薄血針 , 將藥直接輸入血管 . 但係薄血針比口服薄血藥不穩定 , 所以入院初期要每隔6小時驗一次血以確實血液濃度喺安全指數 . 每日 4 次 , 零晨都要比姑娘叫醒抽血 .

愚先生見到太太被抽血嘅地方入院後兩三日已經瘀晒真係好心痛 .

雖然佢地一早已經比人”警告”左 , 有晒心理準備 , 但係痛苦嘅嘢實際永遠比想像更苦 . 不過佢地兩夫婦都堅信一定可以捱過 .

愚先生就算好擔心太太 , 佢每日都努力工作 , 比之前更努力 . 希望盡快完成工作準時放工去醫院 . 因為探病時間只有 6-8pm .雖然容許喺病房外探病 , 但係由於愚太太連接住部須要接駁電源既點滴機 , 所以唔方便離開牀位 .

雖然愚先生好努力 , 但係工作上好多野都非能控制 . 喺最須要”好幫手”既時候 , 愚先生的左右手都有去意 .

不過愚先生覺得哩 d 係上天嘅考驗 , 捱過左人就會變強 .

除左努力工作 , 佢亦更努力練功夫 . 因為第一 : 要有健康身體 , 唔可以比身在醫院嘅太太擔心 ; 

第二 : 應承自己一定要為門派出力 , 自強係首要嘅一步 .

愚先生無論幾夜收工 , 每日都必定去醫院為太太打氣 .

當時愚先生嘅時間表 :  

星期一 : 返工 -> 放工 -> 醫院 -> 武館 -> 屋企 
星期二至五 : 返工 -> 放工 -> 醫院 -> 屋企 
星期六 : 醫院 -> 返工 -> 放工 -> 醫院 -> 屋企 
星期日 : 武館 -> 醫院 -> 家務 -> 醫院 -> 屋企

雖然好堅強 , 但其實愚太太仍然係一個非常頑皮既小女孩  , 喺醫院敷面膜 , 食雪糕 , 叫 Pizza Hut 外賣 , 成日食零食 ……仲有儲印花換7-11熊仔 .

經過兩個多月嘅”努力” , 愚太太出院喇 ! 暫時不用再釣針 , 可以改回口服藥 . 短短兩個幾月內 , 已一共抽過接近 90 次血 .

出院並唔代表可以鬆一口氣 , 而係代表風險由大人加BB平分轉為風險完全落係大人身上 . BB 已經成型 , BB 每日長大等於BB每日要求養份更多 , 亦等於媽媽心臟負荷每日加大 .

除左每星期回院抽血覆診外 , 喺出院期間 , 愚先生愚太太亦見過其他醫生護士 . 有 D 讚愚太太妳真係勇敢 , 有 D 話妳真係好鍾意小朋友 , 有 D 話妳真係好搏 …… 每次聽到哩類 ”讚美” , 愚先生都好驚 . 因為咩講法都好 , 意思都係提醒一切仍然喺冒險當中 .

可能只有愚太太本人唔驚 , 愚先生 , 所有屋企人及醫生護士都為佢擔心 . 不過作為打仗嘅人 , 有天不怕地不怕嘅想法都係件好事 . 而作為軍師嘅愚先生係後方則默默地為太太未來生活而努力 .

上年年尾愚先生嘅努力得到回報 , 佢再次升職加薪而且再次致業 , 為太太及BB準備安樂窩 .
3 月 15 日 係醫生為愚太太計畫剖腹產子嘅”好日子”

3 月 1 日 , 即準備生 BB 之前兩星期 , 愚太太須要再次入院轉薄血針 , 亦要每天抽血 .  不過哩次對於見慣”大場面” 嘅佢嚟講已經唔再怕喇 . 抱住迎接新生命嘅心情每日倒數 , 祈望一切順順利利 .

( 另一方面 , 愚先生仍然每日擔心  )

3 月 15 日 BB 出世喇 ! 愚先生為 BB 改名為 – 余懿 ( 音 : 如意 ) 
雖然太太同BB仍要留院多一段時間未能立即回家團聚 , 但係哩兩年間 , 3 個手術 , 接近二百次抽血 ..... 大家終於可以鬆一口氣


回顧整個”過程” , 大部份聲音都係唔支持 , 覺得佢地哩個決定好傻 . 黎到而家哩一刻 , 大人同 BB 都平安 , 當然要非常感謝醫生護士們 , 更要感謝上天特別憐愛 , 帶比佢地運氣 .


最後 , 究竟佢地係唔係愚蠢 ? 就只有佢地一家三口自己可以評論 .

不過可能肯定嘅係佢地真係好了不起 .


獻給非常了不起嘅老婆 , 並希望妳同 BB 永遠身體健康 .
傻傻地愛著余太嘅愚先生 - 余生 .

( 結婚誓詞 )  :「無論對方生病或健康 , 貧窮或富有 , 都要互相疼愛、扶持 , 直到死亡把我們分開 . 應視對方為此生唯一 , 也是最終的愛 , 有福同享、有難同當 , 有小孩一起帶 . 以此立誓。」
我諗我做得到 .